ताजा
लोकप्रिय
नेपालका लागि निसान सवारीसाधनको आधिकारिक वितरक पायोनियर मोटोकर्प प्रालि. ले निसानको नयाँ प्रिमियम एसयूभी ‘निसान टेकटन (Nissan TEKTON)’ नेपाली बजारमा पहिलो पटक सार्वजनिक गर्ने घोषणा गरेको छ। कम्पनीले आगामी भदौ २७ देखि ३२ गते (अगस्ट ११–१६, २०२६) काठमाडौंको भृकुटीमण्डपमा आयोजना हुने NAIMA Mobility Expo 2026 मार्फत टेकटनलाई नेपाली उपभोक्तामाझ पहिलोपटक प्रस्तुत गर्न लागेको हो।
विश्व बजारमा जुलाई ९, २०२६ मा सार्वजनिक गरिएको टेकटन निसानको पछिल्लो प्रिमियम एसयूभी हो। कम्पनीका अनुसार आकर्षक डिजाइन, अत्याधुनिक प्रविधि, उच्चस्तरीय सुरक्षा र शक्तिशाली कार्यसम्पादनलाई एकैसाथ समेटेर यो मोडल विकास गरिएको हो।
प्याट्रोलबाट प्रेरित डिजाइन
निसानको ७५ वर्षभन्दा लामो एसयूभी विरासतलाई निरन्तरता दिने टेकटनको डिजाइन प्रतिष्ठित निसान प्याट्रोलबाट प्रेरित रहेको कम्पनीले जनाएको छ। मस्कुलर बडी, आकर्षक बडी लाइन, ‘सी’ आकारका एलईडी हेडल्याम्प र दमदार रोड प्रेजेन्स यसको प्रमुख विशेषता हुन्।
१०० प्रतिशत टर्बोचार्ज्ड इन्जिन
टेकटनमा टर्बो टी१६० पावरट्रेन प्रयोग गरिएको छ, जसले उच्च शक्ति, द्रुत एक्सेलेरेशन र इन्धनको राम्रो दक्षता प्रदान गर्ने कम्पनीको दाबी छ। भित्री भागमा फराकिलो केबिन, ठूलो बुट स्पेस तथा लामो यात्रालाई सहज बनाउने विभिन्न सुविधा समावेश गरिएको छ। साथै, Google Built-in प्रविधिमार्फत Google Maps र Google Assistant जस्ता स्मार्ट कनेक्टिभिटी सुविधा पनि उपलब्ध हुनेछ।
एडाससहित उन्नत सुरक्षा प्रणाली
सुरक्षाका लागि टेकटनमा ६ वटा एयरब्याग, उच्च क्षमताको स्टिल बडी स्ट्रक्चर तथा Advanced Driver Assistance Systems (ADAS) समावेश गरिएको छ। यसअन्तर्गत एडाप्टिभ क्रुज कन्ट्रोल, अटोनोमस इमर्जेन्सी ब्रेकिङ, लेन किप असिस्ट, ब्लाइन्ड स्पट वार्निङ तथा ३६० डिग्री क्यामेरा प्रणाली जस्ता आधुनिक सुरक्षा सुविधा उपलब्ध छन्।
एक्स्पोमा प्रत्यक्ष अवलोकनको अवसर
NAIMA Mobility Expo 2026 मा सहभागी हुने आगन्तुकहरूले निसानको स्टलमा पुगेर टेकटनलाई प्रत्यक्ष अवलोकन गर्न, यसको विशेषताबारे जानकारी लिन तथा कम्पनीका उत्पादन विशेषज्ञसँग अन्तरक्रिया गर्न सक्नेछन्।
पायोनियर मोटोकर्पले देशभर फैलिएको आफ्नो बिक्री तथा सेवा सञ्जालमार्फत टेकटनका ग्राहकलाई गुणस्तरीय बिक्रीपछिको सेवा उपलब्ध गराउने प्रतिबद्धता जनाएको छ।
