धनुषाको जनकपुरधाममा बिहीबार दिउँसोदेखि अर्को सूचना जारी नभएसम्मका लागि कर्फ्यु आदेश जारी गरिएको छ।

सुनसरीको कप्तानगन्जमा भएको घटनाको विरोधमा जनकपुरधामका विभिन्न स्थानमा बिहीबार बिहानदेखि प्रदर्शन भएपछि जिल्ला प्रशासन कार्यालय धनुषाले बिहीबार (साउन १४) दिउँसो ३:३० बजेदेखि कर्फ्यु आदेश लागू गरेको हो।

धनुषाका प्रमुख जिल्ला अधिकारी प्रेमप्रसाद लुइँटेलले जनकपुरधाम उपमहानगरपालिकाको सम्पूर्ण क्षेत्र, लक्ष्मीनिया गाउँपालिका तथा नगराइन नगरपालिकाका तोकिएका क्षेत्रमा अर्को सूचना नभएसम्म कर्फ्यु आदेश जारी गरिएको जानकारी दिए।

प्रशासनले जारी गरेको आदेशअनुसार कर्फ्यु अवधिभर सम्बन्धित क्षेत्रमा भेला हुन, जुलुस निकाल्न, प्रदर्शन गर्न तथा घेराउ गर्न पूर्ण प्रतिबन्ध लगाइएको छ।

प्रशासनले सर्वसाधारणलाई कर्फ्यु आदेशको पालना गर्न तथा शान्ति–सुरक्षा कायम राख्न सहयोग गर्न आग्रह गरेको छ।