यातायात व्यवस्था विभागले म्याद सकिन एक वर्षभन्दा कम अवधि बाँकी रहेका सवारी चालक अनुमतिपत्र (लाइसेन्स) नवीकरण गर्न चालकहरूलाई आग्रह गरेको छ।

विभागले नवीकरणपछि नयाँ व्यवस्थाअनुसार १० वर्षका लागि मान्य हुने लाइसेन्स उपलब्ध गराइने जनाएको छ। विभागले जारी गरेको सूचनामा म्याद सकिन एक वर्षभन्दा कम अवधि बाँकी रहेका लाइसेन्स हाल छपाइ नगर्ने व्यवस्था रहेकाले चालकहरूले समयमै नवीकरण गरी १० वर्षे लाइसेन्स लिन उपयुक्त हुने उल्लेख गरेको छ।

यसैबीच, विभागले विगत चार वर्षदेखि रोकिएको लाइसेन्स छपाइको काम सम्पन्न भएको पनि जनाएको छ। विभागका अनुसार गत असारसम्मका सबै पुराना आवेदनका लाइसेन्स छापिसकिएको छ। साउन ७ गतेसम्म २७ लाख ४७ हजारभन्दा बढी लाइसेन्स वितरणका लागि देशभरका विभिन्न यातायात कार्यालयमा पठाइसकिएको विभागले जनाएको छ।

सुरक्षण मुद्रण केन्द्रसँग भएको नयाँ सम्झौतापछि लाइसेन्स छपाइ प्रक्रिया नियमित र तीव्र बनेको विभागको भनाइ छ।