नेपाल धितोपत्र बोर्ड (सेबोन) ले सम्पत्ति शुद्धीकरण (मनी लाउन्डरिङ) सम्बन्धी कानुनी व्यवस्था उल्लंघन गरेको भन्दै तीन ब्रोकर कम्पनीलाई कारबाही गरेको छ।

बोर्डले सम्पत्ति शुद्धीकरण (मनी लाउन्डरिङ) निवारण ऐन, २०६४ को दफा ७क को उपदफा (४) को खण्ड (घ) र दफा ७ग बमोजिमको व्यवस्था उल्लंघन गरेको ठहर गर्दै सिप्ला सेक्युरिटिज, कृष्ण सेक्युरिटिज र हातेमालो फाइनान्सियल सर्भिसेजलाई आर्थिक जरिवाना गरेको हो।

सेबोनले सिप्ला सेक्युरिटिजलाई ५० लाख रुपैयाँ जरिवाना गरेको छ। त्यस्तै, कृष्ण सेक्युरिटिज र हातेमालो फाइनान्सियल सर्भिसेजलाई ३०/३० लाख रुपैयाँका दरले जरिवाना गरिएको छ।

तीनवटै ब्रोकर कम्पनीबाट बोर्डले कुल १ करोड १० लाख रुपैयाँ जरिवाना असुल गरेको जनाएको छ।

सम्पत्ति शुद्धीकरणसम्बन्धी कानुनी दायित्व पालना नगरेको पाइएपछि मनी लाउन्डरिङ निवारण ऐनबमोजिम कारबाही गरिएको सेबोनले जनाएको छ।