नेपाल स्टक एक्सचेन्ज (नेप्से) परिसूचक लगातार चौथो कारोबार दिन पनि ओरालो लागेको छ। बिहीबार नेप्से १६.२९ अंकले घटेर २६७२.५८ विन्दुमा बन्द भएको हो।

बजारमा अधिकांश कम्पनीको सेयर मूल्य घट्दा लगानीकर्ताको मनोबल कमजोर देखिएको छ। बिहीबार ५९ कम्पनीको सेयर मूल्य बढ्दा २०६ कम्पनीको मूल्य घट्यो भने ११ कम्पनीको मूल्य स्थिर रह्यो।

यस दिन ३ अर्ब ३८ करोड १३ लाख १८ हजार रुपैयाँ बराबरको सेयर कारोबार भएको छ। ७५ लाख ४८ हजार कित्ता सेयर ४४ हजार पटक खरिद–बिक्री भएको नेप्सेले जनाएको छ।

कारोबारका क्रममा एभरेष्ट कलर लिमिटेडको सेयर मूल्यमा सकारात्मक सर्किट लागेको छ। कम्पनीको सेयर मूल्य बढेर १ हजार १३८ रुपैयाँ पुगेको छ। त्यस्तै सेन्ट्रल फाइनान्स, शुभम् पावर, तारागाउँ रिजेन्सी र एनएमबी हाइब्रिड फन्ड उच्च मूल्य वृद्धि हुने कम्पनीको सूचीमा परेका छन्।

समूहगत प्रदर्शनतर्फ भने १३ वटै उपसमूहका परिसूचक घटेका छन्। तीमध्ये हाइड्रोपावर उपसमूह सबैभन्दा धेरै १.२० प्रतिशतले घटेको छ। लगातारको गिरावटसँगै नेप्से परिसूचक साताको सुरुआतदेखि नै दबाबमा रहेको देखिएको छ भने कारोबार रकम पनि क्रमशः घट्दै गएको छ।