बेनी हाइड्रोपावर प्रोजेक्ट लिमिटेडले भदौ २२ गतेदेखि सर्वसाधारणका लागि प्राथमिक सेयर (आईपीओ) निष्कासन गर्ने भएको छ। कम्पनीले प्रतिकित्ता १०० रुपैयाँ अंकित दरमा ८ लाख ६३ हजार २ सय कित्ता सेयर सर्वसाधारणका लागि बिक्री खुला गर्न लागेको हो।
कम्पनीले कुल २० करोड ८० लाख रुपैयाँबराबरको २० लाख ८० हजार कित्ता आईपीओ निष्कासन गर्न नेपाल धितोपत्र बोर्डबाट अनुमति पाएको थियो। यसअघि कम्पनीले जारी पुँजीको १० प्रतिशत अर्थात् १० लाख ४० हजार कित्ता सेयर आयोजना प्रभावित क्षेत्रका स्थानीय बासिन्दाका लागि निष्कासन तथा बाँडफाँड गरिसकेको छ।
त्यस्तै, सर्वसाधारणका लागि छुट्याइएको सेयरमध्ये २ प्रतिशत अर्थात् २० हजार ८ सय कित्ता कर्मचारीका लागि, ५ प्रतिशत अर्थात् ५२ हजार कित्ता सामूहिक लगानी कोषका लागि तथा १० प्रतिशत अर्थात् १ लाख ४ हजार कित्ता वैदेशिक रोजगारीमा रहेका नेपालीका लागि छुट्याएर बाँकी रहेको सेयर सर्वसाधारणमा निष्कासन गर्न लागिएको हो।
न्यूनतम १० कित्ताका लागि आवेदन
सर्वसाधारणले कम्पनीको आईपीओमा न्यूनतम १० कित्तादेखि अधिकतम १० हजार कित्तासम्म आवेदन दिन सक्नेछन्। आईपीओमा आवेदन दिने अवधि छिटोमा भदौ २५ गतेसम्म रहनेछ। सो अवधिभित्र सबै सेयर बिक्री नभएमा भने आवेदन अवधि असोज ५ गतेसम्म लम्बिन सक्नेछ।
लगानीकर्ताले नेपाल धितोपत्र बोर्डबाट स्वीकृति प्राप्त आस्बा सदस्य बैंक तथा वित्तीय संस्था तथा तिनका तोकिएका शाखाबाट आवेदन दिन सक्नेछन्। साथै, मेरो सेयरमार्फत पनि आवेदन दिन सकिनेछ। कम्पनीको आईपीओ निष्कासन तथा बिक्री प्रबन्धक एनएमबि क्यापिटल लिमिटेड रहेको छ।
‘बीबी प्लस’ रेटिङ, मध्यम जोखिमको संकेत
क्रेडिट रेटिङ संस्था इक्रा नेपालले कम्पनीलाई ‘इक्रा आईआर डबल बी प्लस’ रेटिङ प्रदान गरेको छ। यसले कम्पनीको वित्तीय दायित्व समयमै पूरा गर्ने क्षमतामा मध्यम स्तरको जोखिम रहेको संकेत गर्छ।
हाइड्रोपावर कम्पनीको आईपीओमा लगानी गर्दा लगानीकर्ताले आयोजनाको उत्पादन अवस्था, वित्तीय प्रदर्शन, ऋण दायित्व, विद्युत् बिक्री सम्झौता तथा भविष्यको आम्दानीको सम्भावनासमेत अध्ययन गर्नु आवश्यक हुन्छ।
प्रतिक्रिया दिनुहोस