अख्तियार दुरुपयोग अनुसन्धान आयोगले राप्ती स्वास्थ्य विज्ञान प्रतिष्ठानमा एमआरआई मेसिन खरिदमा अनियमितता भएको आरोपमा तत्कालीन उपकुलपति प्रा.डा. संगिता सिंह भण्डारीसहित १३ जनाविरुद्ध विशेष अदालतमा भ्रष्टाचार मुद्दा दायर गरेको छ।

अख्तियारका अनुसार, एमआरआई खरिदका क्रममा ६२ लाख ६० हजार ९४६ रुपैयाँ भ्रष्टाचार भएको देखिएपछि बिहीबार (असोज २४) विशेष अदालत, काठमाडौंमा मुद्दा दायर गरिएको हो। आयोगले प्रतिष्ठानले ९ करोड १९ लाख ५३ हजार ७४२ रुपैयाँ भुक्तानी गरिसकेको उल्लेख गर्दै सोही बराबरको बिगो दाबी पनि गरेको छ।

अख्तियारको अनुसन्धानअनुसार, एमआरआई खरिदका लागि ११ करोड ४५ लाख रुपैयाँमा कबोल गरिएको भए पनि १२ करोड ७ लाख ६० हजार ९४६ रुपैयाँ देखाइएको छ, जसले ६२ लाख ६० हजार रुपैयाँको आर्थिक भार प्रतिष्ठानमा परेको आयोगको आरोपपत्रमा उल्लेख छ।

मुद्दा दायर गरिएकामध्ये पूर्व उपकुलपति भण्डारी र तत्कालीन कार्यवाहक रजिष्ट्रार झन्कार लामिछानेका साथै तत्कालीन फाइनान्स म्यानेजर कैलाश प्रसाद देव, बायोमेडिकल इन्जिनियर शरद भण्डारी, डेपुटी फाइनान्स म्यानेजर नितिन कुर्मी, शाखा अधिकृत छायाँ डीसी र श्रीराम चौधरी, आईटी अफिसर हिरालाल भण्डारी, सिभिल इन्जिनियर मदन भण्डारी, वरिष्ठ सहायक अन्जु शर्मा, बायोमेडिकल इन्जिनियर सुजाता भट्टराई, त्रिवि शिक्षण अस्पतालका इन्जिनियर अमित कुमार चौधरी, र लुम्बिनी हेल्थकेयर प्रालिका अध्यक्ष पोष्ट राज ज्ञवाली रहेका छन्।