देशको बैंकिङ प्रणालीमा एकैदिन ११ अर्ब रुपैयाँ निक्षेप बाहिरिएको छ। नेपाल राष्ट्र बैंकको पछिल्लो तथ्यांकअनुसार कार्तिक ११ गते बैंक तथा वित्तीय संस्थाहरूको निक्षेप ११ अर्बले घटेर ७४ खर्ब ७५ अर्ब रुपैयाँमा झरेको हो।

अघिल्लो दिन अर्थात् कार्तिक १० गते सम्म बैंक तथा वित्तीय संस्थामा कुल ७४ खर्ब ८९ अर्ब रुपैयाँ निक्षेप रहेको थियो। राष्ट्र बैंकका अनुसार सो अवधिमा वाणिज्य बैंकहरूबाट मात्र १४ अर्ब रुपैयाँ निक्षेप बाहिरिएको छ। अन्य वित्तीय क्षेत्रहरूमा भने हाल ७ खर्ब ५८ अर्ब रुपैयाँ निक्षेप रहेको छ।

अघिल्लो दिनसम्म ६७ खर्ब ३१ अर्ब रुपैयाँ निक्षेप रहेको वाणिज्य बैंकमा निक्षेप घटेर ६७ खर्ब १७ अर्ब रुपैयाँमा सीमित भएको राष्ट्र बैंकले जनाएको छ। यस अवधिमा बैंक तथा वित्तीय संस्थाहरूले ५६ खर्ब ३५ अर्ब रुपैयाँ कर्जा लगानी गरेका छन्। जसमध्ये वाणिज्य बैंकहरूको कर्जा लगानी ५० खर्ब १२ अर्ब रुपैयाँ र अन्य वित्तीय संस्थाहरूको कर्जा लगानी ६ खर्ब २३ अर्ब रुपैयाँ रहेको छ।

राष्ट्र बैंकको अनुसार, समीक्षा अवधिमा अन्तर बैंक कारोबारको ब्याजदर २.७५ प्रतिशत कायम भएको छ भने सिडी अनुपात (CD Ratio) ७४.५३ प्रतिशत मा झरेको छ। बैंकिङ क्षेत्रका जानकारहरूका अनुसार पछिल्ला दिनमा सरकारी भुक्तानी, बजार तरलता र ऋण भुक्तानीका कारण निक्षेप घट्ने प्रवृत्ति देखिएको छ। उनीहरूले यो अवस्थालाई अल्पकालीन तरलता उतारचढावको सामान्य चक्र भएको बताउँदै चाँडै स्थायित्व आउने विश्वास व्यक्त गरेका छन्।