नेपालले आर्थिक वर्ष २०८२/८३ मा लक्ष्यअनुसार वैदेशिक सहायता प्राप्त गर्न नसकेको देखिएको छ। अर्थ मन्त्रालयका अनुसार गत आर्थिक वर्ष लक्ष्य गरिएको वैदेशिक सहायताको केवल ४५.६६ प्रतिशत मात्र प्राप्त भएको छ।

मन्त्रालयले सार्वजनिक गरेको विवरणअनुसार गत आर्थिक वर्ष २ खर्ब ८७ अर्ब ११ करोड रुपैयाँ वैदेशिक सहायता प्राप्त गर्ने लक्ष्य राखिएको थियो। यसमध्ये २ खर्ब ३३ अर्ब ६६ करोड ३१ लाख रुपैयाँ ऋण र ५३ अर्ब ४४ करोड ६९ लाख रुपैयाँ अनुदान प्राप्त गर्ने लक्ष्य थियो।

तर, आर्थिक वर्षभर नेपालले १ खर्ब ३१ अर्ब ८ करोड २० लाख रुपैयाँ मात्रै वैदेशिक सहायता प्राप्त गर्न सफल भएको छ। प्राप्त सहायतामध्ये १ खर्ब ९ अर्ब ४६ करोड ९३ लाख रुपैयाँ ऋण र २१ अर्ब ६१ करोड २७ लाख रुपैयाँ अनुदान रहेको मन्त्रालयले जनाएको छ।

तथ्यांकअनुसार नेपालले लक्षित वैदेशिक ऋणको ४६.८५ प्रतिशत र लक्षित अनुदानको ४०.४४ प्रतिशत मात्र प्राप्त गरेको छ।

यस्तै, दातृ राष्ट्र तथा विकास साझेदारहरूले गरेको प्रतिबद्धताअनुसारको सहायता पनि पूर्ण रूपमा प्राप्त हुन सकेन। गत आर्थिक वर्ष नेपालले १ खर्ब ६१ अर्ब ४६ करोड ३३ लाख २० हजार रुपैयाँ बराबरको वैदेशिक सहायता प्रतिबद्धता प्राप्त गरेको थियो।

तर, प्रतिबद्धतामध्ये १ खर्ब ३१ अर्ब ८ करोड २० लाख रुपैयाँ मात्रै प्राप्त हुँदा ३० अर्ब ३८ करोड ४३ लाख रुपैयाँ बराबरको सहायता प्राप्त हुन सकेन।

अर्थ मन्त्रालयका अनुसार गत आर्थिक वर्षको कुल वैदेशिक सहायता प्रतिबद्धतामध्ये १ खर्ब २४ अर्ब ३३ करोड ३४ लाख ७० हजार रुपैयाँ ऋण र ३७ अर्ब १२ करोड ९८ लाख ५० हजार रुपैयाँ अनुदान रहेको थियो।