अख्तियार दुरुपयोग अनुसन्धान आयोगले सशस्त्र प्रहरी बल नेपाल बोर्डर आउट पोस्ट मझगाँवा, रुपन्देहीका कार्यालय प्रमुख सशस्त्र प्रहरी निरीक्षक हरिचन्द्र ढकाल र सशस्त्र प्रहरी जवान यामबहादुर खत्रीविरुद्ध घुस लिएको आरोपमा मुद्दा दायर गरेको छ।

अख्तियारका अनुसार रुपन्देहीको कोटहीमाई–५ स्थित सशस्त्र प्रहरी बल नेपाल बोर्डर आउट पोस्ट मझगाँवामा कार्यरत जवान खत्रीले भारतबाट भन्सार छली अवैधरूपमा कपडा तथा किराना सामान ल्याउने कार्यमा सहजीकरण गरिदिने भन्दै सेवाग्राहीसँग १५ हजार रुपैयाँ घुस लिँदै गर्दा नियन्त्रणमा लिइएका थिए।

अनुसन्धानका क्रममा जवान खत्री र निरीक्षक ढकालबीच आपसी मिलेमतो र योजनाअनुसार भारतको दुर्गौलिया नाकाबाट नेपालमा घरायसी सामान ल्याउन सहजीकरण गर्ने उद्देश्यले सो रकम लिएको प्रमाणित भएको आयोगले जनाएको छ। सोही आधारमा अख्तियारले दुवै जनाविरुद्ध शुक्रबार विशेष अदालत, काठमाडौंमा भ्रष्टाचारको मुद्दा दायर गरेको जनाएको छ