शनिवार , श्रावण २३, २०८३
नेपाल–चीन व्यापारको प्रमुख स्थलमार्ग तातोपानी नाका तीन साताभन्दा लामो समयदेखि अवरुद्ध हुँदा दुई देशबीचको व्यापार प्रभावित भएको छ। पहिरोका कारण सडक अवरुद्ध भएपछि चीनबाट नेपालतर्फ आउने मालवाहक कन्टेनरसमेत नाकासम्म आइपुग्न सकेका छैनन्।
तातोपानी भन्सार कार्यालयका प्रमुख भन्सार अधिकृत दीपेन्द्रप्रकाश गिरीका अनुसार विभिन्न स्थानमा गएको पहिरोका कारण सडक अवरुद्ध हुँदा नाकाबाट हुने आयात–निर्यात प्रभावित भएको हो।
‘नाकातर्फ जाने सडक अवरुद्ध भएकाले चीनबाट मालवाहक सामानसहितका कन्टेनर पनि भित्रिन सकेका छैनन्,’ गिरीले भने, ‘सडक कहिलेदेखि सञ्चालनमा आउँछ भन्ने अहिलेसम्म टुंगो लागेको छैन।’
तातोपानी नाका चीनसँगको नेपालको व्यापारका लागि महत्वपूर्ण स्थलमार्ग हो। नाका अवरुद्ध हुँदा चीनबाट आयात हुने वस्तुको ढुवानी प्रभावित हुनुका साथै व्यापारिक गतिविधि र राजस्व संकलनमा समेत असर पर्ने देखिएको छ।
विशेषगरी चीनबाट आयात हुने तयारी वस्तु, विद्युतीय सामग्री, मेसिनरी, निर्माण सामग्री तथा दैनिक उपभोग्य वस्तुको आपूर्ति प्रभावित हुन सक्ने व्यवसायीहरूको भनाइ छ। सडक लामो समय अवरुद्ध रहेमा आयातकर्ताले वैकल्पिक नाका वा मार्ग प्रयोग गर्नुपर्ने अवस्था आउन सक्ने भएकाले ढुवानी लागतसमेत बढ्न सक्छ।
यद्यपि सडक खुल्ने निश्चित समय तय नभएकाले व्यापार नियमित रूपमा सञ्चालनमा आउन अझै केही समय लाग्न सक्ने भन्सार कार्यालयले जनाएको छ।
तातोपानी नाका अवरुद्ध भएको यो अवस्थाले नेपाल–चीन व्यापारका लागि स्थलमार्गको पूर्वाधारको संवेदनशीलता पनि देखाएको छ। वर्षायाममा पहिरोका कारण सडक अवरुद्ध हुँदा आयात–निर्यातसँगै सरकारको भन्सार राजस्व, व्यवसायीको ढुवानी लागत र बजारमा वस्तुको आपूर्तिमा समेत प्रत्यक्ष असर पर्ने गर्छ।
Be the first to comment!
© 2026 All right reserved to businessnewsnepal.com
Design & Developed By
प्रतिक्रिया दिनुहोस