शुक्रवार , भाद्र ५, २०८३
साताको अन्तिम कारोबार दिन नेप्से परिसूचक १० अंकभन्दा बढीले घटेको छ। अघिल्लो दिन सामान्य सुधार आएको बजार शुक्रबार पुनः दबाबमा फर्किँदा नेप्से २६१८.७२ विन्दुमा झरेको हो।
शुक्रबार नेप्से परिसूचक १०.६७ अंकले घटेको छ। बिहीबार सामान्य अंकले बढेको बजार एक दिनमै पुनः ओरालो लाग्दा लगानीकर्ताको सक्रियता पनि केही खुम्चिएको छ। यस दिन सेन्सेटिभ इन्डेक्स १.५४ अंक, फ्लोट इन्डेक्स ०.६१ अंक र सेन्सेटिभ फ्लोट इन्डेक्स ०.३८ अंकले घटेका छन्।
नेप्से घटेसँगै शुक्रबार कारोबार रकम पनि अघिल्लो दिनको तुलनामा कम भएको छ। बिहीबार ४ अर्ब ४० करोड रुपैयाँ बराबरको सेयर कारोबार भएकोमा शुक्रबार ४ अर्ब १६ करोड ७६ लाख रुपैयाँ बराबरको कारोबार भएको छ। यस दिन ३४४ स्टकको ५९ हजार ८०५ पटकको कारोबारमा १ करोड २२ हजार कित्ता सेयर किनबेच भएको छ।
बजार समग्रमा घटे पनि केही कम्पनीका सेयरमा भने खरिदकर्ताको आकर्षण देखिएको छ। सर्वोत्तम पेन्ट्सको सेयरमूल्य सकारात्मक सर्किटमा कारोबार भएको छ। कम्पनीको सेयरमूल्य १०४ रुपैयाँले बढेर ७९७ रुपैयाँ ६० पैसा पुगेको छ।
त्यस्तै, पञ्चकन्या माइ हाइड्रोपावरको सेयरमूल्य करिब १४ प्रतिशतले बढेको छ। यता कारोबारमा आएको धौलागिरी लघुवित्त वित्तीय संस्थाको सेयरमूल्य सर्वाधिक ५.२६ प्रतिशतले घटेको छ।
कारोबार रकमका आधारमा रिलायन्स स्पिनिङ्ग मिल्स शीर्ष स्थानमा रहेको छ। कम्पनीको २६ करोड ३७ लाख रुपैयाँ बराबरको सेयर कारोबार भएको छ। त्यस्तै, सोलु हाइड्रोपावरको साढे २४ करोड रुपैयाँभन्दा बढी र रिडी पावर कम्पनीको १८ करोड ५० लाख रुपैयाँभन्दा बढीको सेयर कारोबार भएको छ।
शुक्रबार बजारमा व्यापक गिरावट देखिएको छ। नेप्सेका १३ उपसमूहमध्ये १२ उपसमूहको परिसूचक घटेको छ भने एउटा मात्र बढेको छ। म्युचुअल फन्ड उपसमूह सामान्य अंकले बढ्दा अन्य उपसमूह सर्वाधिक १.०६ प्रतिशतले घटेको छ।
यसरी साताको अन्तिम दिन नेप्से, कारोबार रकम र अधिकांश उपसमूहमा एकसाथ कमजोरी देखिँदा बजारमा खरिदकर्ताको तुलनामा बिक्री दबाब केही बलियो देखिएको छ।
Be the first to comment!
© 2026 All right reserved to businessnewsnepal.com
Design & Developed By
प्रतिक्रिया दिनुहोस