लुम्बिनी सांस्कृतिक नगरपालिकाका प्रमुख सजरुद्दिन मुसलमानको निधन भएको छ। हृदयघातबाट आज बिहान उनको निधन भएको नगरपालिकाका कर्मचारी खुशीराम लामिछानेले जानकारी दिए । स्वास्थ्यमा समस्या देखिएपछि उपचार गराउन जाने क्रममा उनको निधन भएको हो ।

स्थानीय युवा करण पाण्डेका अनुसार बिहान मुसलमानको छातीमा समस्या देखिएपछि परिवारले उपचारका लागि चिकित्सकसहित भैरहवास्थित अस्पताल लैजाने क्रममा भैरहवा–लुम्बिनी सडक अन्तर्गत महजिदिया नजिक मृत्यु भएको पाण्डेले जानकारी दिए।

अहिले लुम्बिनी सांस्कृतिक नगरपालिका–३, पडरियास्थित निवासमा मुसलमानको शव राखिएको छ। परिवारका अनुसार प्रमुखसहित नगरपालिकाको टिम एक साता लामो सिंगापुर र मलेसियाको भ्रमण पूरा गरेर शुक्रबार मात्रै घर फर्किएका थिए।

उनी नेपाली कांग्रेसका तर्फबाट प्रमुखमा विजयी भएका थिए। गत चुनावमा उनी ८,२११ मत ल्याएर नगरपालिकाको प्रमुखमा निर्वाचित भएका थिए। उपप्रमुख कल्पना हरिजन भने एमालेबाट निर्वाचित भएकी थिइन्।