श्रम संस्कृति पार्टीका अध्यक्ष तथा सांसद हर्क साम्पाङ राईले कैलालीमा एक टेम्पोलाई भीरबाट खसालिएको घटनाप्रति गम्भीर आपत्ति जनाउँदै दोषीमाथि कारबाही र पीडितलाई उचित क्षतिपूर्ति उपलब्ध गराउन सरकारसँग माग गरेका छन्। आज सोमबार बसेको प्रतिनिधिसभा बैठकमा बोल्दै साम्पाङले सामाजिक सञ्जालमा सार्वजनिक भएको भिडियोप्रति ध्यानाकर्षण गराउँदै वन प्रहरीको उपस्थितिमा एक गरिब टेम्पो चालकको सवारीसाधन भीरबाट गुल्ट्याइएको दृश्यले आफूहरू मर्माहत भएको बताए।

उनले घटनाको निष्पक्ष छानबिन गरी संलग्न व्यक्तिमाथि कानुनी कारबाही गर्न तथा पीडित चालकलाई क्षतिपूर्ति उपलब्ध गराउन गृहमन्त्रीको ध्यानाकर्षण गराए। साम्पाङले सोही क्रममा घरको छानामाथि ढुंगा हानिएको अर्को दृश्य पनि देखिएको उल्लेख गर्दै पछिल्लो समय प्रहरीको व्यवहारप्रति चिन्ता व्यक्त गरे। नागरिकले प्रहरी देख्दा सुरक्षा र संरक्षणको अनुभूति गर्नुपर्ने भए पनि केही घटनाका कारण प्रहरीप्रति डर र त्रासको वातावरण सिर्जना भएको उनको भनाइ थियो।

“एउटा गरिब दुःखी टेम्पो चालकको टेम्पो वन प्रहरीको उपस्थितिमा भीरबाट गुल्ट्याइदिँदै गरेको भिडियो देखियो। त्यो दृश्यले हामी मर्माहत छौं। दोषीलाई कारबाही होस् र पीडितलाई क्षतिपूर्तिको व्यवस्था गरियोस्,” साम्पाङले संसदमा भने।

उनले थपे, “प्रहरी देख्नेबित्तिकै शान्ति सुरक्षाको महसुस हुनुपर्ने हो। तर आजभोलि केही घटनाले प्रहरी देख्दा डर र आतंक मान्ने अवस्था सिर्जना भएको छ। यस्तो वातावरण तुरुन्त सच्याइनुपर्छ।” गत जेठ २९ गते डिभिजन वन कार्यालय कैलालीका कर्मचारीले अतिक्रमण हटाउने क्रममा गोदावरी नगरपालिका–४ मा एक महिलाको टेम्पो भीरबाट खसालिएको भिडियो सार्वजनिक भएपछि उक्त घटनाले व्यापक चर्चा पाएको थियो।