नेपाल राष्ट्र बैंकले आफ्नो विभिन्न कोषमा रहेको २४ अर्ब १८ करोड ७६ लाख रुपैयाँ बैंक तथा वित्तीय संस्थाको मुद्दती निक्षेपमा लगानी गर्ने भएको छ। यसका लागि इच्छुक बैंक तथा वित्तीय संस्थालाई ब्याजदर प्रस्ताव पेश गर्न आह्वान गरिएको छ।

राष्ट्र बैंकका अनुसार बैंकहरूले साउन १८ गते राति १२ बजेसम्म ब्याजदर प्रस्ताव पेश गर्न सक्नेछन्। कुल रकममध्ये १९ अर्ब ३५ करोड २ लाख रुपैयाँ वाणिज्य बैंक, ३ अर्ब ६२ करोड ८१ लाख रुपैयाँ राष्ट्रियस्तरका विकास बैंक र १ अर्ब २० करोड ९३ लाख रुपैयाँ राष्ट्रियस्तरका वित्त कम्पनीमा मुद्दती निक्षेपका रूपमा लगानी गरिनेछ।

मुद्दती निक्षेपका लागि छनोट हुन बैंक तथा वित्तीय संस्थाले केही न्यूनतम मापदण्ड पूरा गरेको हुनुपर्ने राष्ट्र बैंकले जनाएको छ। त्यसअनुसार सम्बन्धित संस्था सञ्चालनमा आएको कम्तीमा दुई वर्ष पूरा भएको हुनुपर्नेछ। साथै, राष्ट्र बैंकले तोकेको न्यूनतम कुल पुँजीकोष अनुपात कायम गरेको हुनुपर्नेछ।

त्यस्तै, निष्क्रिय कर्जा (एनपीएल) अनुपात ८ प्रतिशतभन्दा बढी र खुद निष्क्रिय कर्जा अनुपात ३ प्रतिशतभन्दा बढी हुन नहुने व्यवस्था गरिएको छ। खुद तरल सम्पत्ति अनुपात र कर्जा–निक्षेप अनुपात पनि राष्ट्र बैंकले तोकेको सीमाभित्र हुनुपर्नेछ।

यसका अतिरिक्त, निकटतम आर्थिक वर्षको वित्तीय विवरणअनुसार खुद नाफामा रहेको तथा शीघ्र सुधारात्मक कारबाहीमा परेको संस्था भए त्यस्तो कारबाही फुकुवा भएको कम्तीमा छ महिना पूरा भएको हुनुपर्ने शर्त पनि राष्ट्र बैंकले राखेको छ।

राष्ट्र बैंकले तोकेका यी मापदण्ड पूरा गर्ने बैंक तथा वित्तीय संस्थाले मात्र मुद्दती निक्षेपका लागि प्रतिस्पर्धा गर्न सक्नेछन्।