नाबिल बैंक लिमिटेडले आफ्ना २ हजार ४७३ जना कर्मचारीका लागि प्रतिव्यक्ति १० लाख रुपैयाँ बराबरको समूह जीवन बीमा (ग्रुप टर्म लाइफ इन्स्योरेन्स) गराउने प्रक्रिया अघि बढाएको छ। बैंकले उक्त बीमा सेवा उपलब्ध गराउन इच्छुक जीवन बीमा कम्पनीहरूबाट सिलबन्दी प्रस्ताव आह्वान गरेको हो।

बैंकले जारी गरेको सूचनाअनुसार बीमा योजनाले सबै प्रकारका मृत्युका कारणलाई समेट्ने व्यवस्था हुनुपर्नेछ।

बोलपत्रमा सहभागी हुन चाहने जीवन बीमा कम्पनीहरूले नोटरी प्रमाणित प्यान/भ्याट दर्ता प्रमाणपत्र, कम्पनी दर्ता तथा नवीकरण प्रमाणपत्र, पछिल्ला दुई आर्थिक वर्षको लेखापरीक्षण प्रतिवेदन, कर चुक्ता प्रमाणपत्र, प्रमुख ग्राहकहरूको सूची तथा प्रवर्द्धक र प्रमुख व्यवस्थापन टोलीको संक्षिप्त विवरण पेश गर्नुपर्नेछ।

इच्छुक कम्पनीहरूले आफ्नो प्रस्ताव सिलबन्दी खाममा राखी नाबिल बैंकको प्रशासन विभागमा साउन २८ गते बेलुका ४ बजेसम्म बुझाइसक्नुपर्ने बैंकले जनाएको छ। तोकिएको समयपछि प्राप्त हुने प्रस्ताव भने स्वीकार गरिने छैन।

नाबिल बैंकले कर्मचारीको सामाजिक सुरक्षा र जोखिम व्यवस्थापनलाई थप सुदृढ बनाउने उद्देश्यले समूह जीवन बीमा सेवा छनोट प्रक्रिया अघि बढाएको जनाएको छ।