साताको सुरुआतदेखि नै ओरालो लागेको नेपाल स्टक एक्सचेन्ज (नेप्से) परिसूचक बुधबार पनि घटेको छ। बुधबार नेप्से परिसूचक ७.७९ अंकले घटेर २६८८.८८ विन्दुमा झरेको हो। यस दिन सेन्सेटिभ इन्डेक्स ०.७८ अंक, फ्लोट इन्डेक्स ०.६५ अंक र सेन्सेटिभ फ्लोट इन्डेक्स ०.४२ अंकले घटेका छन्।

नेप्सेसँगै कारोबार रकम पनि घटेको छ। मंगलबार ४ अर्ब ४२ करोड रुपैयाँबराबरको सेयर कारोबार भएको बजारमा बुधबार ३४३ वटा स्टकको ४८ हजार पटकको कारोबारमा ४ अर्ब २ करोड ९४ लाख रुपैयाँबराबरको ९७ लाख ७७ हजार कित्ता सेयर खरिदबिक्री भएको छ।

बुधबार कारोबार भएका कम्पनीमध्ये ७८ वटा कम्पनीको सेयर मूल्य बढेको छ भने १८६ वटा कम्पनीको सेयर मूल्य घटेको छ। ११ वटा कम्पनीको सेयर मूल्य भने स्थिर रहेको छ।

एभरेस्ट कलरको सेयर मूल्य लगातार आठौँ कारोबार दिन सकारात्मक सर्किट लागेको छ। यस दिन कम्पनीको सेयर मूल्य १२९ रुपैयाँ १० पैसा बढेर ९९० रुपैयाँ १० पैसामा अन्तिम कारोबार भएको छ। त्यस्तै, कालिञ्चोक हाइड्रोपावरको सेयर मूल्य करिब साढे १२ प्रतिशतले बढेको छ। अन्य उच्च मूल्य बढ्ने कम्पनीको सेयर मूल्य वृद्धि भने ५ प्रतिशतभन्दा कम रहेको छ।

कारोबार रकमका आधारमा हिमालयन पावर पार्टनर शीर्ष स्थानमा रहेको छ। कम्पनीको २२ करोड ४८ लाख रुपैयाँबराबरको सेयर कारोबार भएको छ। त्यस्तै, खानीखोला हाइड्रोपावरको २१ करोड रुपैयाँभन्दा बढीको सेयर कारोबार भएको छ भने रिलायन्स स्पिनिङ मिल्सको करिब १८ करोड रुपैयाँबराबरको सेयर किनबेच भएको छ।

समूहगत परिसूचकतर्फ १३ मध्ये दुई उपसमूहको सूचक बढेको छ भने ११ उपसमूहको सूचक घटेको छ। बुधबार म्युचुअल फन्ड र अन्य उपसमूहको सूचक बढेका छन् भने बाँकी ११ उपसमूहको सूचक घटेका छन्।

यससँगै पछिल्ला तीन कारोबार दिनदेखि नेप्से लगातार घटेको छ। बजारमा कारोबार रकमसमेत क्रमशः घट्दै जाँदा लगानीकर्ताको सक्रियतामा पनि केही कमी आएको देखिएको छ।